خطوطنا الجوية، أنظمتها غبية

بعد طول وقت من تأجيل الإضافة للتدوينة ،، [ خطوطنا الجوية، أنظمتها غبية ] بين يديكم ،،،

هذا طول الله في أعمار القارئين بعد فترة الحجر المصاحبة للعملية قررت أزور عيال عمي في الرياض من باب تغيير الجو والارتياح من الالتزامات شوي خصوصي أنه كانت فترة الاختبارات على الأبواب، وحتى ما تكون الرحلة طويلة ومرهقة لي بطول الجلوس قررت أني أسافر بالخطوط ونعتزل الطريق البري.

فرحت لمكتب الخطوط عندنا في القصيم اللي من أول ما دخلت وأنا حاس أني دخلت بحر من الهموم والقلق، الجو حار حار حار حار ، الكراسي أبداً مو ثابتة كل شوي تشوف واحد يفز يخاف الكرسي يطيح، 20 كونتر استقبال خمسة بس اللي عليها موظفين، والأخير أخذت رقم وقدامي اكثر من 35 شخص….

مالكم في كثر الكلام، جلست أنتظر وكان بجنبي رجل الله يذكره بالخير موظف بالطيران المدني ( شغال في المطار يعني ) لكن الخطوط ما تسمح له يحجز من مقر عمله لازم يجيهم في مكتب الحجز وحقيقةً الحاجة الوحيدة اللي سعدت فيها هناك أني قابلته إنسان محترم وقمة في الذوق ،، انتظرت تقريباً ساعتين أو ساعتين وربع ووصلني الدور أبشركم، رحت عند الموظف ، وجرى الحوار التالي:

أنا: سلام عليكم ، يسعد مساءك

الموظف: أهلا وسهلا

أنا: لو سمحت أبغى أحجز على رحلة ( قصيم- رياض ) بكرهـ العصر

الموظف: والله أتوقع أنها فل لكن بشيك لك ،،،،،، آآه للأسف فل لكن في مقاعد انتظار

أنا: يعني ما ينفع أبد؟

الموظف: لا، احجز انتظار وتواجد في المطار الساعة 5 وسجل اسمك انتظار ثاني مره

وانتظر لحد ما يأكدوه لك واحتمال يتأكد اليوم وتوصلك رسالة على الجوال

أنا: أكيد وإلا مشاوير بدون فايدة ؟

الموظف: إن شاء الله يتأكد معك اليوم ،،

أنا: طيب بالنسبة لخصم الطلاب لازم من هنا أو في المطار يخدموني؟

الموظف: إن شاء الله لو تأكد الحجز الأخوان في المطار راح يخدمونك

أنا: شكراً لك عزيزي،،

الموظف: أهلا وسهلا ،، لكن تحب تدفع قيمة التذكرة الحين أو تنتظر التفعيل؟

أنا: لا بنتظر التفعيل لأني ما راح أكون فاضي أرجع أطالب بقيمة التذكرة ، يعطيك العافية

الموظف: حياك

،،،،،

بكل بساطة وتلخيص للحوار السابق، أني انتظرت ساعتين بدون أدنى فائدة، مع أنه كان بالامكان إخباري أن الرحلة فل من بدري الخطوط لديها امكانية وضع شاشة تحتوي على الرحلات المقفلة ليومين قدام على الأقل ،،

/

في المطار،،، ( بختصر لأني انقهرت وأنا اتذكر هههه )

جيت الساعة خمسة والله لا يوريكم زحمة ، قالوا لي رح سجل اسمك عند الأخ اللي هناك فرحت وسجلت وعطاني رقم ( 46 ) وانتظرت لحد 7 واعلنوا الرحلة فلما رحت عند كونتر الانتظار قال للأسف الطيارة فل ،، وفي كم مقعد درجة أولى أعطوها للبنات اللي كانوا واقفين ما معهم حجز ، لكن دايم البنت الكل في الكل مدام المسئول سعودي،، حتى أنه راح يركض يدور لها صرف لأنه ما كان معها كاش،،،!!!!

وكان معي ولد عمي فراح لأحد موظفين البوردينج وقاله يا أخي توسط خلنا نخلص ونأكد الحجز، قال أخينا ( أعرفك ؟ تعرفني ؟ ) قال ولد عمي لا والله ما أعرفك ،، لكن سعودي مثلك وأكيد بتفزع وتمشينا ،، قال لا والله ما أعرفك يعني ما أقدر أسوي لك شئ ،، لكن أخذ له كلمتين من ولد عمي يحبها قلبه ،، باحترام لكن ما تخلا من الانتقاد اللاذع ههههههه ،، ^_~

،،،،

الأنظمة الغبية اللي أتكلم عنها من وجهة نظري طبعاً ،،

~ كونترات الحجز في مكتب الخطوط فااااضية بدون موظفين ، من المسئول ؟ وين احترام العميل والعمل على راحته ؟

~ انتظار بالساعات لرحلات مقفلة مع أنه بإمكان الخطوط وضع شاشة أو تنبيه لها بأي طريقة ،،، لكن النظام غبي أو من يديرونه !!!

~ الحجوزات الغير مؤكدة عشوائية في المطار ولا يوجد مسئول رسمي عنها ،، وبالمشرمح ( مزارق طيب عند الموظفين ) ،،!!

~ الموظفين بكل بجاحة وتعدي ، أنت تعرفني أنا أمشيك على طوووول !!

~ نظام التذاكر حتى الأن كأنه نظام دوس ،، مستحيل تفهم ورقة التذكرة اللي معك ..!!!

~ حتى لو كانت معك تذكرة انتظار بمجرد أنك تجد مقعد ،، لازم تدفع كاش تذكرة جديدة ،،

من كان راح يعوضني لو أنا دافع عند صاحبنا الأول اللي قال ادفع هنا ؟؟ نظام متضارب وغبي

~ نظام الخطوط أن الطيارة ما تتأخر دقيقة حتى لو كانت بالاصل واصلة متأخرهـ حتى لو كانت

تطلع فاضية ، مسئولهم كان يقول أهم شئ نطلع خلال خمس دقايق ما علينا من الحجوزات ،،

~ مسافر كان حاجز اوكي ودافع الفلوس ومعه البوردينج ،، واقف يسألهم ساعة وما أحد

أعطاه وجه بالأخير لما انتبهوا له قالوا راح مقعدك للانتظار والطيارة بتقلع ،، وين النظام اللي يحميه ؟؟

~ كامل الاحترام للبنات ،، ولكن كان المفروض أن الحجوزات تعطى حسب الأهمية وليس فزعة

الشاب السعودي للفتاة السعودية ،، مع تهميش أفراد المجتمع الآخرين ،،

؛

بالأخير سافرت مع البر ،، يا لبى السفر ،، بمزاجك تمشي بلا خطوط بلا وجع رأس

[ الكتابة كانت بالعامية خالجها بعض الفصحى هههههه لا تدققون ]

أتمنى ما أكون مجحف لكن كلامي صحيح ،، وأتحدى شخص سافر مع الخطوط سابقاً وما اشتكى منها او من موظفيها ،،

،،

صباحكم ورد ،، ودمتم كما تحبون

Be Sociable, Share!

•